Le Poesie
Poesie in dialetto siciliano
PARTIA FRANCUZZU
Giulio Todaro
Patri Santu, Patri Santuzzu
Stamatina ccu primu lustru
Partia Francuzzu.
Partia pu’ cielu senza valigia nè spacu
Nudu di tuttu.
Cchi s’ava purtari, ti veni a truvari.
Partia sulu suluzzu
E aviva prescia d’arrivari.
Di so piccati l’ha pirdunari
Aprici a porta du to jardinu
Picchi ‘ccà facia beni e facia capiri
Ca cci vo’ misiricordia.
Fallu trasiri a to casa, dacci a to acqua.
Dacci riparu quannu u so silenziu si fa sulu
E unn’abbannunari mai.
Dacci u to amuri e a frunti ti vasa
Un Pianufurti, fallu sunari e cantari
Ca ti porta gioia nu cori.
No, unn’abbannunari pirchi Francuzzu
E’ na pirsuna spiciali
e tu Patri Santu
e tu Patri Santu
Di iddu cura aviri.
Di sta bedda terra di Sicilia
Francuzzu sinni ia
Tutti u cantammu, tutti u sunammu.
Ma tu Patri santu
a Francuzzu u canusci
a Francuzzu u canusci
Di tutti i mari canusci i to pisci.
Dicci a Francuzzu ca nattri
Unn’u putemu scurdari,
Patri fannillu ssu piaciri
Ora ni sintemmu chiù suli
Tuttu passa e tuttu scumpari.
E chiddu c’arresta è u to amuri.
E tu Francuzzu un ti scuraggiari
Cca jusu unni scurdammu u to mari.
Mi veni ‘na pena intra stu cori
Ca un voli accittari,
ca di sta terra vasata du suli
Un jornu puru nattri
Ninn’amma jiri.
A Franco Battiato
18 Maggio 2021
LI STACIUNA DI L’AMURI
Nino Isca
Ciuri chi mai fusti cchiù beddu di taliari
Ciuri chi mai cchiù prufumatu di ciarari
Ciuri chi quannu agghiorna ‘ncori trasi
Raggiu di suli cogghi e ti lu vasi.
Fruttu chi mai fusti cchiù ‘bbonu di tastari
Fruttu chi mai cchiù sapuritu di mangiari
Fruttu chi du tò ciauru m’annegghi
E u cori meu lu ‘mmiachi e ti lu pigghi.
Di ciuri a fruttu ‘nsemmula criscemu
D’amuri e sintimentu n’arricchemu
Lu fruttu detti corpu a la simenza
Ci’agghiunci ora all’amuri la spiranza.
A STIDDA
Simona Sciuto
Chissa e’ na storia incredibili
di na bedda carusa tanto amabili,
da tutti canusciuta
Ppa tanta razia e gioia posseduta,
splende comu na stidda
e arriala felicita’ a cu sta cu idda.
Avi u spiritu di na guerriera
e sapi scalari na muntagna intera,
e a so ranni vittoria
restera’ ppi sempre na nostra memoria.
COMU SI CANCIA E SOCCU SI CI APPIZZA
Nino Isca
Si persi…
puru iddu ora si persi;
e’gghiò chi ‘cci chiria quannu ricia
“picciotti mei, mi fa lanzari ‘st’esterofilia”.
Iddu….
iddu chi palatinu si facia
di lu beddu parlari n’sicilianu
e quannu ‘nna parola ci mancava
subbitu una nova n’attruvava.
Dui, tri paroli, pir’esempiu ricu:
corleones
pi ‘ppalle ammintuava,
natantu
pi ogni tantu ricitava
e tanti d’autri chi a sentilu, vi ricu,
quasi chi quasi ‘ncapu mi pisciava.
Ora l’ultimu scogghiu o mari s’arrinniu
e senza assicunnari pintimentu
ni parla ‘gnisi cu tuttu ‘ddu buliu
chi sbutulia uredda e sintimentu
e si’nni futti
si vantannusi ricia
chi ’nsicilianu emu a parlari tutti.
Er’accussì “a’ttia taliu” ci’addivintaru
maccarruniannu ‘gnisi
“at you I watch”
“at you I watch”
chi pari giustu giustu un patataru
chi di patati sta jittannu i scocci.
E ancora
“I dance-upon-your heads-at all-of you”
“I dance-upon-your heads-at all-of you”
traruci e picciutteddi paru paru
“viriti chi v’abballu a tutti ‘ntesta”.
E a mia m’accabba la pacenzia e pensu
chi fora beddu, senza rari ‘nguesta,
putiri ancora diri ‘nsintimentu
“sta picciuttedda mi fa veru sensu”,
pi ‘rivilari tuttu e ‘cchiù di tuttu puru
di soccu ‘ncori meu ora mi sentu.
U PRESEPIU
Lino Borgesato
E’ di notti e tuttu taci
Sunnu suli n’ta na rutta
Iddi tri cu sceccu e vacca
Quannu fora friddu fà.
Eni fumo o eni neglia?
O è luci ca m’abbaglia?
Eni stidda a cincu punti
Ca cuntenti tutti fà.
Succiriu tant’anni arrieri
Iddu sunnu ancora dda
N’ta li menti e n’ta li cori
Di famigli icati nsiemi
Tali e quali chiddi idda.
U CARZARATU
Lino Borgesato
U Suli
quannu trasi n’ta so casa
cumincia musciu musciu a so livata
sapi aviri iddu ducazioni
sapi puru visutu fari
sapi iddu puru accumpagnari.
ddu cristianu ca n’chiusu s’arritrova
e sulu passa li nuttati e iorna.
Avi tuttu u tiempu pi pinsari,
siddu fui giustu chiddu ca iddu fici,
ora cu lu cantu s’accumpagna
rannu o so cori anticchia d’arripuosu
picchì trattatu l’avi a fierru e a fuocu.
Avi bisuognu d’unu o qurchicosa
vuliss’iddu pirdunu addumannari
a tutti li cristiani ca sciuppiau
a tutti chiddi ca ci rettiru firucia,
a tuttu lu criatu e a lu so Diu
vasannu n’terra quannu Suli trasi.
A PASSIONI
Lino Borgesato
Scausu, strazzatu, npasturatu, affamatu,
Nmmardiddatu d’un lignu duru .
Duru ancora .
Cuomu lignu vivu, virdi, ca fuocu stenta e un’attizza .
E’ssiri armali, e’ssiri firi, e’ssiri figliu di Diu .
Ma picchì tantu avi avviniri ?
Picchì accussi forti haiu a suffriri?
Oh matri mia,oh Diu santissimu, pau du rieu li so piccati .
Stu sciatu puortu a fini
Sientu lu fierru n’ta carni trasiri
M’attruova cu l’uocchi di tutti li genti
Ca m’addumannunu, forti, pietà.
A VUCI DA ME TERRA
Michelangelo Balistreri
Tu ca si luntanu
e nun canusci la me terra
e ‘ntra lu so distinu
vidi sulu mafia e guerra.
Tu l’ha vistu mai all’arba u suli
quannu u mari l’arruspigghia
e cu so caluri asciuga lu suduri
di la me genti ca travagghia.
Tu l’ha vistu mai
u lustru di lampari
dintra li nostri cori
quannu puru u duluri
stancu di tuppuliari
addiventa amuri.
Si, tu mi po diri
picchi mi scrivi sulu cosi duci
senza mai numinari
tutti li cristi misi ‘ncruci
e ti rispunnu
tu l’ha ‘ntisu mai
a vuci da me terra
è na puisia
l’autri cosi
nun fannu parti
ne di la genti
ne di la terra mia.
A CAPOCCI E CAPUCCIUNA
Vincenzo Caruso (1917 – 2003)
Sdissussati li timpuna,
fabbricati casi e scoli,
nun faciti cchiù cannuna
chi la paci non li voli.
Costruiti li spitali
Pi li genti cchiù malati,
e ritrovi pi li vecchi
a lu spissu abbannunati.
Dati acciansa, in ogni locu,
a ddi poveri mischini
chi nunn’hanu pani e “focu”
e su spessu nta li spini.
Dati un regnu a cu n’è privu
Chi la “corda” è troppu tranta,
si vuliti chi la paci
furra puri n’Terra Santa.
E pirtantu dicu a tutti:
nichi e grossi capucciuna,
c’aggiustassiru cca ntera
e lassassiru la luna.
Quannu n’terra è sistimatu
Nta qualunchi continenti,
riturnati nta la luna
a rifari sperimenti
PINSERI DI UN EMIGRATU
Giovanni Canzoneri
Dda Sicilia cu tanti ciuri e biddizzi rari
comu ‘nu re mi fici abidicari
Duvennu cu li nerbi emigrari
la sorti ‘NCanada mi vozi mannari
Pur jennu sempri li duttura a visitari,
a quasi quarant’anni mi cci fici arrivari.
Ora lu disidderiu mi vinni di vuliri riturnari
ma nun sacciu sidda m’innegghiri o cca ristari.
Forsi eni la natura chi mi stà a chiamari
nun facennumi ne notti ne ghiornu ripusari.
Ora la Santa cá Bivona vinni a visitari
cci dumannu la grazia di putirimi aiutari.
Idda eni la protettrici e dda vozi miditari,
A mia e a tutta la famiglia a Bivona farimmi turnari
U ME PAISI
Composta da un piccolo emigrante in America
U me paisi e` tantu nicu e tantu beddu,
ma cu tuttu u me cori u vogghiu beni,
comu tuttu u munnu.
Pero` c’e` na cuosa c’a mmia un mi piaci,
cca un c’e` travagghiu e tutti sinni stannu iennu,
e puru io minni v’aiu.
E ppo na` stu paisi c’e` nautru difiettu,
mancanu certi cuosi pi nuatri picciriddi!
Pero` u` me paisi mi piaci,
e pi mia e` u paisi chiu` beddu ru munnu!
Addiu MILICIA bedda!
LA MADONNA DI LU TRIBONU
Liborio Dia
A tempi antichi dintra d’un gruttuni
Cuvertu di ruvetti e d’autri spini
Ci stava ‘mpirtusatu un gran latruni
Lu veru capu di li malantrini
Avia lu sò curazzu,d’un liuni,
Fu lu tirannu di li cittadini,
Rubbannu ed ammazzannu di cuntinu
E pò ‘ntanava comu un porcu spinu
Era tiranni assai ,lu sò caminu,
Terreni ni scarpisava cchiù d’un trenu…
Scalidda ,Muntilongu,Firricinu,
E ‘ntutti l’autri parti ‘unn’appi frenu…
Ma un venniri di marzu di matinu
Pi vuluntà di Cristu Nazarenu
Cumpari si vitti ,sullivata,
In estasi ,la Matri Addulurata!
Di lacrimi era tutta assammarata
‘Sta Beddamatri Santa e sapurita
‘Ch’avia la sò facciuzza stracanciata
Pri Gesù Cristu tuttu ‘na firita…
Lu latru quannu vitti a ‘sta Biata
Gran Matri ,cu lu figghiu senza vita
Si misi a lacrimari addinucchiatu
Cu l’arma ,cu lu cori e cu lu ciatu.
Di tannu ‘mpoi si ‘ntisi rinnuvatu,
Di tintu addivintau ,bonufinutu,
Però si stava dda,sempri ‘ntanatu,
Chiancennu ‘ntra la grutta ,prisulutu,
E poi “Lu latru bonu” fu chiamatu
Chi a tanti puvureddi dava aiutu,
Ed a la morti sò lassau appizzata
‘Na bedda Santa di l’Addulurata.
RIGORDU DI ’NA MANU ISATA
Vju e guardu lu paisi,
quannu ancora
avia li balàti;
e la genti, fora,
‘nta li strati,
sutta lu suli cucenti,
parrari junciuta;
mentri all’umbra
di ‘na manu jsata,
‘na vicchiaredda
joca
a lu carmuciu ‘mbambulatu
ca cu lu sguardu assenti
curri
‘ntra dda fàula ‘nvintata.
Ora, a tempu scurdatu,
cercu, caminannu
nna ddi strati…, nenti.
La genti, ca tannu
parrava,
ora, fui ‘nfretta.
Lu carmuciu, già granni,
s’avvrazza forti
a lu prisenti,
jornu senza méta,
cursa sfrinata.
Quantu valuri avia,
oh carmuciu…!
dda manu isata.
Salvatore Fazio
Unni quannu unni sugnu, a sira
quannu ma arricogghiu stancu da travaghiari,
è u suli si fici vasciu, lu cori miu spera di riturnari a casa mia,
Unni quannu unni sugnu a me infanzia nu ma scordu mai…
unni quannu e unni sugnu e idda cca
mi fici crisciri fotti e fieru di essiri catanisi,
li me pinseri si fannu strata a sugnari a festa di sant’aituzza, è na canzuni duci e
siciliana canta intra lume cori…..
Sta luntanza, ma luntanau ma non mi fici scurdari nenti…
Unni quannu e unni segnu a me sicilia resta intra lu me cori….
unni quannu e unni sugnu!!!!!!
SUGNU SICILIANU?
Antonino Sicari
Sugnu turiscu o sugnu francis?
Arabu o griacu?
Spagnualu fuaiss
o vichiggnu?
Sul’u Signur u sap!
Tant vùat mi ddrumannu
e mai mi rugnu rispuascta
Vurriss rir siciliànu
cuamu ricinu miricanu tutt’irazz ru munnu
ca truvar’a manna nna ddra tiarra
e s’ truanavu ddra
Ma ddra ci sunn’i dollar,
ci sunn’i ran
E fannu tutt fisctazza,
fannu tutt schifazzu
e s’n’ tuttnu
s’ fuara un puannu mancu manciar
bascta ca mancianu iddr!
Ca, siamu rispirat
e risprirat nno cuar
c’un sapiamu
mancu r’unn viniamu
ma un nni sintiamu
ancuara siciliàn.
Faciamunn gialli
com’i nuascr
camp r’ ranu,
o vijd
com’i nuascr muntagn
nno mmiainnu,
blu com’u nuascru mar
faciamunn siciliàn.
SICILIANI DISULATI
Giovanni Canzoneri
Sicilia bedda, comu sì ruvinata
Eri la prima stidda e ora si disulata
Granni eri a lu tempu di li Turchi,
mentri ora troppu genti caccianu muschi.
‘Nni lu continenti li fabbrichi jeru a fari
e di sta terra si voziru scurdari.
A lu nordi tutti vannu a travagghiari
mentri ‘nti natri di fami s’avi a muriri.
Fora di la sò terra li Siculi annagghiri
facennu sacrifici p’arricchiri
e doppu ca na vita fora jeru a passari
‘nti la sò terra nuddu voli cchiù turnari.
Sperannu ca la vita va a cangiari
comu ‘na stidda tu a riturnari.
Ora ti lassanu cu li cori malati.
Chisti su li vuci di li Siculi emigrati.
‘U MIRACULU RI SANTA LUCIA
Mi rissi me nanna, quann’era nica:
“Ora ti cuntu ‘na storia antica”.
‘Ncapu li ammi mi fici assittari
e araciu araciu si misi a cuntari.
“Ci fu ‘na vota, a Siracusa
‘na caristìa troppu dannusa.
Pani ‘un cinn’era e tanti famigghi
‘un n’arriniscìanu a sfamari li figghi.
Ma puru ‘m mezzu a la disperazioni
‘un ci mancava mai ‘a devozioni
e addumannavanu a Santa Lucia
chi li sarvassi d’a caristìa.
‘U beddru jornu arrivau di luntanu
rintra ‘u portu siracusanu
‘na navi carrica di frummentu
a liberalli ri ‘ddru turmentu.
Pi li cristiani la gioia fu tanta
chi tutti vuciavanu ‘viva la Santa!’,
picchì fu grazi a la so ‘ntercessioni
ch’avìa arrivatu ‘ddra binirizioni.
Tutti accurrìanu a la marina,
ma era frummentu, ‘un n’era farina
e cu ‘u pitittu ch’un facìa abbintari
‘un c’era tempu di iri a macinari.
Pi mettisi subitu ‘n’sarvamentu
avìanu a cociri lu stessu frummentu
e pi la forma ‘a coccia’ ch’avìa
accuminciaru a chiamalla ‘cuccìa’.
La bona nova arrivau luntana
e pi sta màrtiri siracusana
fu accussì ranni la venerazioni
chi fici nasciri ‘na tradizioni.
Passau lu tempu d’a caristìa
e arristau l’usanza pi Santa Lucia:
d’un fari pani, d’un cociri pasta,
e di manciari la cuccìa e basta.
Ma lu sapemu, ci voli picca
e l’usanza di scarsa addiventa ricca.
A ognunu ci vinni la bedda pinzata
di priparalla chiù elaborata.
Cu ci mittìa ‘u biancumanciari
e cu vinu cottu ci vosi ammiscari.
Cu ci vulìa ‘u meli ri ficu
e tanti autri cosi, chi mancu ti ricu.
Ma jò vulissi sapiri, a la fine,
di runni spuntaru ‘sti beddre arancine?
E m’addumànnu di quali manu
nasceru panelli e risu a tianu?”
E a mèntri chi me nanna si sfirniciàva,
a mia ‘u stommacu mi murmuriava
e mi ricordu chi c’avissi rittu:
“Me nanna, zittuti ch’haiu pitittu!”
CHISTA È A ME GENTI
Rosanna Alberghina
Sugnu na signura
Di mia lu munnu assai mi sparra
Mi dici: “di malarazza sfurnu figghi e di malagenti sugnu atturniata”
Chistu lu munnu dici di mia
Ma vui, nun datici cuntu a sta mala diciria
A li superbi antichi
Greci, arabi, francisi, spagnoli
Accuglienza calurusa ci seppi dari
Nascinu ni mia
Figghi artisti e sapienti
chista è a me genti
Ora, mi vogghiu prisintari:
Sicilia
È lu me nomi
Na terra maliditta
Diu mi fici
e di Iddu sugnu figghia
Figghia… Biniditta.
LU ME’ DIALITTEDDU
Giovanni Canzoneri
Lu sapiti pirchì amu lu mè dialitteddu?
Pirchì nun fazzu sforzu cu lu mè ciriveddu.
Eni la matri lingua, lu mè sicilianeddu
mi lu ‘nsignaru quann’era picciutteddu.
Pirchì nun ci’nni levu e nun ci’nni mettu,
quannu cantu, attenta a lu mè pettu
ca lu meli, cu fu, ci lu misi,
pirchì eni onestu, tenniru e curtisi.
L’amu pirchì ci sentu ‘nni la vuci
tutti li mè nanni e li mè amici,
di tutti li mè vivi e li mè morti
l’amu pirchì mi fa parlari forti.
Li biddizzi tò mi fannu tantu filici,
antica terra mia, cori mio duci!
ZIFFIANNU ZIFFIANNU
Nino Isca
I pupetti di me’ figghiu
su pupetti di cunsigghiu,
a ricetta è di so patri
comu li facemu niatri.
Mezzu chilu di tritatu,
megghiu riri capuliatu,
e poi spaccacci ‘du ova,
sali, pipi, spicchiu d’agghia
ritagghiatu finu finu,
‘nna ziffiata piddusinu
e un alitu di vinu.
Ci poi mettiri a muddica
s’iddu voi, macari senza,
ma lu toccu di l’essenza
è ‘ddu beddu picurinu
chi ti lassa senza ciatu:
ma chi ciauru, binirica!
E poi ‘mpasta tutti i cosi
comu s’iddu avissi a fari
pani friscu ‘nta maidda.
‘Nta la chianta di la manu
tu ci formi la pupetta
quantu un ovu di puddastra
si voi farila perfetta;
‘nta paredda ogghiu d’aliva
li suffriggi cu pacenza,
poi li metti ‘nta la sarsa
e li coci a focu lentu
finu a quannu ‘unn’arriva
l’ura di lu sintimentu.
Maccarruna ‘nta lu piattu,
lu spettaculu è perfettu
vinni l’ura chi’gghiò aspettu
pigghia e ‘ntavula m’assettu.
U SIGNURUZZU E’ GRANNI
Nino Isca
U Signuruzzu è granni:
Iddu lu sapi,
Iddu canusci strata di duluri,
ni sapi stari acciancu
e accarizzari
c’un cori sempri carricu d’amuri.
Pi’nniatri chiama l’Angiuli di ‘ncelu
a libbirarini l’occhi di lu velu
e ‘nzignarini a viriri luntanu,
er’accapiri,
finalmenti,
chiddu
ch’avi ‘nna vita
chi ‘nni voli diri.
E di ‘sta malatia e ‘sti pinseri
vogghiu farimi forza
pi daveru
pi crisciri e avvicinarimi o Signuri,
e a cu cunfortu mi voli purtari
cu’ccori chinu
e lacrimi ammucciati,
cunfortu iò ci vulissi dunari.
Ora tiru un suspiru e m’arrisettu,
mi stringiu u Scapulari ‘nta lu pettu,
la Liturgia mi recitu di l’Uri
pi ringraziari sempri lu Signuri.
U TRAVAGGHIU RO MASSARU
Tiziana Stracquadanio
Turi Turiddu,
cu tuttu rispiettu
ansigniti a fari
a ricotta e a manciari.
U latti miettulu a cauriari,
abbiaci u quagghiu e fai ripusari.
Ora ch’é bona, rumpi a quagghiata,
falla annuriri e a tuma é attumata.
Allacciata attorna falla cauriari
e a 50 grati u sali abbiati.
E u latti a ricotta si cci’ábbiari
sinnó ricotta nunni pó accianari.
E arrumina bonu, nunn’á fari accarpari
sinnó a ricotta chi fietu c’affari.
L’urtimu sali si cci’abbiari,
senza ri iddu nun pó accianari.
Ora é accianata, chi sciauru ca fá
Tennira, soffici, bona sará.
Miettici u pani ‘nta nappitedda
Mamma che bona, mamma che bedda.
Ora a ricotta t’ansignatu a fari
mancia Turiddu e puoi campari.
(Poesia vincitrice del primo premio della poesia siciliana, sezione giovani, nel comune di Monterosso Almo, nell’anno 1997)
A ME MATRI
Paolo Ferrigno
Tu mi criscisti, mi mannasti a scola…
e poi mi mittisti l‘ali e mi dicisti…vola.
E iù vulai ‘ntra paisi strani,
senza pinzari ca ti lassai ‘nte peni.
Partii,..ti lassai sula,
comu na varca senza vela,
a testa frasturnata…l‘occhi chini,
e senza sangu ‘nta tutti li to vini!
Ti lassai sula… partii luntanu,
ma vidu ancòra ca mi stenni a manu,
mi salutavi e mi dicevi torna,
t‘aspettu cca, cuntu li me jorna.
Ora c’haiu furriatu menzu munnu,
e l’haiu vistu quasi ‘nsinu ‘nfunnu,
ora m’arriposu e pensu a tia,
ccu tantu amuri e tanta nustalgia.
E pensu quantu beni mi vulevi,
e quanti cosi beddi mi dicevi;
attentu, non sudari…s‘annunca t‘arrifriddi,
e duci duci mi mittevi i manu ‘nte capiddi!
M‘accarizzavi, mi strincevi forti…
siparari ni po’ sulu la morti!
La morti ‘npitiusa t‘arrubbau,
e luntanu…luntanu di mia ti purtau!
Si fici tardu, passànu li me anni,
tra gioi, duluri e peni ranni!
Stancu é u me cori, stanca é la testa,
ma prestu n‘incuntramu e sarà festa!
L’OMU SENZA LA DONNA
Pino Vizzini
L’omu avi la varba e si senti importanti
l’omu senza la donna nun iè nenti
iè cumu na cosa inutili e vacanti
cumu un rastiddu ca nun avi denti
La donna duna all’omu la mportanza
ci dà lu fruttu di la so simenza
ci duna gioia, ci duna pristanza
e l’arricchisci di la so presenza
L’omu senza la donna è lampadina
ca manca la correnti e nun adduma
cumu lu sciumi quannu fa la china
sdirrupa vuschi e inchi li vadduna
L’omu senza la donna è un carritteri
ci manca lu cavaddu ppi ‘mpaiari
picchissu l’omu cerca la muglieri
ppi lu carrettu putiri tirari
L’omu senza la donna è maidduni
iè na maidda ca nun ‘mpasta pani
iè nu marruggiu senza lu zappuni
iè un campanariu senza li campani
L’omu senza la donna è un canniliri
manca lu miccu e nun si po’ addumari
ora amicu ti lu vugliu diri
l’omu senza la donna nun sa stari
IDDU
Simona Sciuto
Iddu ca luccichía comu nsuli
e potta alligria peri peri…
Iddu ca comu nvulcanu arrusbigghiatu,
pari ca rommi ma non s’arriposa mai..
Iddu ca na cchiu’ tinta situazioni,
nesci sempri u cunigghiu do cappeddu…
Iddu ca sona unniegghie’,
macari npianoforti senza tasti…
Iddu ca talía u mari e a natura
cu l’occhi assetati di mpicciriddu…
A “Iddu” ca e’ “tantu”!
A ME PATRI
Francesco Dragotto
Ricordu Patri miu,
ca mai nuddu tantu suffriu…
Ancora l’occhi tu l’avevi vivi…
però la facci tua scumpariu…..
Ormai ca tu cu mia nun ci si cchiù….
sulu ‘ntò sonnu ti pozzu vasari jù….
sulu ‘ntò sonnu ti pozzu tuccari li manu….
spirannu ca ‘cchiù tardu agghiorna rumani….!!
Iu discurru….travagghiu…però sugnu canciatu
di quannu ddu malirittu jornu fusti malatu….
U sacciu…hannu a passari jorna e ura…..
e ancora nnaiu a viriri dulura….
però sugnu tranquillu,
si tu mi stai o latu,
iu sacciu ca sugnu cunsulatu…
Mai….nun lu putiti mai capiri
vuatri ca mi stati a sintiri…
l’ummira chi fu ru patri miu…
pi tutta a vita mi la portu iu.
A voti la so facci cercu ‘ncelu…
taliannu comu fussi ‘menzu on velu.
U sacciu,un ti viu patri miu…
picchi’ tu si ddassupra..
tu si vicinu a Diu.
U sacciu, ormai tu si già cunsulatu…
pi chistu a Diu l’haiu già priatu…
L’armuzza tua è bedda e cunsulata
e ora iu ti mannu na vasata.
U RIMIEDIU
Si pigli ogni paisi a unu a unu
Pari ca sunnu i stissi l’unu e l’atru
Aunni ogni vita agghiorna e scura
E nenti pari ca un s’assumiglia.
L’aria piccanti è cuomu lu spiezziu
U vientu asciuca l’ossa intra la fossa
E l’acqua duna sciatu a li rarici
Ca nta li petri appizzunu la vita.
Muglieri, matri e suoru, fimmini surdi
Ch’hannu di chi fari nta la casa
E pi li figli fannu vita dura.
Ma aunni manca u pani e c’è a rariglia
E u sanggu acchiana n’testa a parapiglia
U scartu attrova liggi pi campari
Ca u portunu sicuru o juornu appriessu.
PUISIA VASTASA
Nino Isca
Ti stampu ‘nna puisia quattru e quattrottu
si tu mi runi un titulu di bottu;
si tu mi rici per esempiu “riccu”
iò cu la pinna ‘mprima mi’cci ficcu.
Si tu mi senti riri ancora “pazza”
a rrima iò ti fazzu cu “sta mazza”
e siddu o masculinu sentu “pazzu”
allura a rrima è facili “stu cazzu”.
Ma un mi’mmitari a ddiri parulazzi
picchì anche o plurali fannu “cazzi”.
Sta puisia è vastasa? A leggila t’affenni?
Ormai puru i nuddica sunnu ranni.
Si ti mussìi fatti ‘nna caminata
e senti comu si parla ‘nmezzu a strata.
Eppuru cunfirariti vurria
chi sutta sutta a pensu comu a’ttia.
Entra anche tu a far parte del mondo di SalviamoilSiciliano!
Contribuisci anche tu!
Mandaci tutte le espressioni dialettali che usi, le parole particolari che si dicono anche solo nella tua città, i proverbi che magari hai sentito dire ai tuoi nonni con relativa traduzione. E da oggi potete inviarci le commedie in dialetto siciliano scritte da voi e anche poesie, preghiere e quant’altro vogliate per rendere un servizio alla nostra lingua siciliana!
Salviamo il Siciliano
News
Si arricchisce la sezione delle poesie29 Maggio 2022 - 16:48Arricchita la sezione delle poesie con un brano dedicato a Franco Battiato
Salviamo il Siciliano compie 20 anni!3 Settembre 2021 - 0:3120 anni! Tanti auguri Salviamo il Siciliano!